Rritet ndjeshëm numri i britanikëve që marrin shtetësi austriake

Numri i shtetasve britanikë që kanë fituar shtetësi austriake është rritur ndjeshëm që nga dalja e Mbretërisë së Bashkuar nga Bashkimi Evropian më 31 janar 2020. Sipas të dhënave të Ministrisë së Brendshme të Austrisë, aplikimet për shtetësi nga shtetas britanikë kanë shënuar rritje të konsiderueshme dhe mbeten shumë më të larta se para Brexit-it, shkruan The Local, transmeton albinfo.ch.

Nga vetëm 4 deri në 44 aplikime në vit gjatë periudhës 2013–2018, numri u rrit në 96 në vitin 2019, për të arritur në 125 në vitin 2020. Rritja më e madhe u regjistrua në vitin 2021, kur 1.190 shtetas britanikë u natyralizuan si qytetarë austriakë. Ky trend vazhdoi në vitin 2022 me 1.593 raste, 1.123 në vitin 2023 dhe 938 gjatë vitit 2024.

Kjo rritje lidhet kryesisht me dy faktorë kryesorë: humbja e të drejtave të lëvizjes dhe punës në BE për shtetasit britanikë pas Brexit-it, si dhe një ndryshim në ligjin austriak për shtetësinë, që nga viti 2019 u lejon pasardhësve të viktimave të persekutimit nazist të rifitojnë shtetësinë austriake pa hequr dorë nga shtetësia britanike.

Vetëm në vitin 2024, 908 shtetas britanikë fituan shtetësinë austriake përmes këtij ligji, duke e renditur Mbretërinë e Bashkuar në mesin e tri vendeve me më së shumti natyralizime të këtij lloji, së bashku me Izraelin dhe Shtetet e Bashkuara, transmeton albinfo.ch.

Ndërkohë, për britanikët që banojnë në Austri pas përfundimit të periudhës tranzitore më 31 dhjetor 2020, procesi për marrjen e lejes së qëndrimit dhe shtetësisë është bërë më i ndërlikuar, duke kërkuar kushte më të rrepta.

Ekspertët vlerësojnë se trendi i aplikimeve mund të ulet gradualisht, pasi një pjesë e madhe e të kualifikuarve tashmë e kanë përfituar shtetësinë. Megjithatë, britanikët mbeten ende një nga grupet më të mëdha të aplikuesve për shtetësi në Austri.

Sipas autoriteteve, për shumë aplikues, vendimi për t’u bërë qytetarë austriakë është një kombinim mes nevojës për siguri ligjore dhe dëshirës për të rifituar lidhjen me BE-në dhe trashëgiminë personale, transmeton albinfo.ch.