Gjermania do ta bëjë më të lehtë blerjen e biletave të trenave ndërkombëtarë

(KEYSTONE/Christian Beutler)

Nga vjeshta 2025, Deutsche Bahn (DB) do të integrohet në një sistem të ri rezervimesh evropian që do t’i lejojë pasagjerët të blejnë bileta ndërkombëtare përmes një platforme të vetme, si faqja bahn.de apo aplikacioni DB Navigator.

Aktualisht, për shumë udhëtime ndërkufitare, pasagjerët duhet të blejnë bileta nga kompani të ndryshme, shpesh me çmime më të larta. Me sistemin e ri, synohet që deri në fund të vitit 2026 të gjitha linjat kryesore evropiane të jenë të mbuluara me bileta të unifikuara dhe çmime të qarta, transmeton albinfo.ch.

Ky ndryshim është pjesë e një nisme të Bashkimit Evropian për të thjeshtuar udhëtimet me tren nëpër Evropë, ndërsa DB ka shënuar rritje të fortë në udhëtimet ndërkombëtare që nga viti 2019.