“‘One Stop Shop’ nis edhe në pikën kufitare Jazhincë-Glloboçicë

Nga sot edhe pika kufitare Jazhincë-Glloboçicë bëhet pjesë e sistemit “One Stop Shop”, një kontroll i vetëm për kalimin nga Maqedonia në Kosovë dhe anasjelltas. Pas suksesit të dëshmuar në Bllacë, kjo pikë kufitare modernizohet për të përshpejtuar qarkullimin dhe kursyer kohë për udhëtarët.

Në ceremoninë përuruese morën pjesë zëvendëskryeministri i parë i Maqedonisë, Izet Mexhiti, ministri i Brendshëm, Pançe Toshkovski, dhe homologu i tij kosovar, Xhelal Sveçla, transmeton albinfo.ch.

Mexhiti theksoi se ky sistem e ka afruar Shkupin me Prishtinën dhe tani e bën edhe Tetovën më të afërt. “Në fillim kishte dilema, por Bllaca na tregoi se funksionon, pritjet disa-minutëshe janë bërë realitet. Tani po dëshmojmë se kur ka vullnet dhe bashkëpunim, gjithçka është e mundur”, tha ai.

Ministri Toshkovski falënderoi homologun kosovar për bashkëpunimin dhe theksoi se modeli do të zgjerohet edhe me Shqipërinë e Serbinë.

Edhe ministri kosovar Xhelal Sveçla vlerësoi lartë rëndësinë e nisjes së kësaj iniciative. “Falë bashkëpunimit të dy qeverive, qytetarët në këtë pikë kufitare përjetojnë një përvojë më të shpejtë, më të thjeshtë e më njerëzore. Kontrolli hyrje-hyrje dëshmon frymën e re të bashkëpunimit”, u shpreh ai.