Stimulohet punësimi i grave në ndërmarrësi

Gratë në Kosovë marrin pjesë me 21.1 për qind në tregun e punës, ndërsa vetëm 13 për qind e Ndërmarrjeve janë në pronësi të tyre. Ky është punësimi më i ulët në rajon

Kosova është në vendin e fundit në rajon sa i përket punësimit të grave dhe udhëheqjes së bizneseve nga gratë. Raporti i fundit tregon se gratë në Kosovë në tregun e punës marrin pjesë me 21.1 për qind, përderisa vetëm 13 për qind e Ndërmarrjeve të Vogla dhe të Mesme janë në pronësi të tyre.

Për të stimuluar punësimin e grave, në Prishtinë, me organizimin të Dhomës ekonomike të grave të Kosovës “G7”, Shoqatës afariste të gruas “SHE-ERA”, Gratë për Gratë dhe me mbështetje të programit të Ndërmarrësisë të Femrave  të Bankës TEB, u organizua një program me titull: “Ngjarja e Grave Ndërmarrëse të Kosovës”.

Ngjarja e cila kishte për synim promovimin dhe mbështetjen institucionale të grave ndërmarrëse mblodhi në një vend palë të ndryshme, nga sektori i biznesit deri te institucionet qeveritare, te përfaqësuesit diplomatik në mbështetje të nismës për të sjellë në dukje pozitën e pabarabartë të grave në sektorin e biznesit.

Ministrja e Tregtisë dhe Industrisë, Hykmete Bajrami tha se ky lloj i programeve e iniciativave janë jetike për mbështetjen dhe suksesin e grave ndërmarrëse. “Angazhimi i institucioneve financiare sikurse TEB vlerësohet lartë dhe shpresojmë t’i shërbejë shoqërisë si një shembull i mirë”, deklaroi ajo.

Lendita Kastrati nga Dhoma Ekonomike e Grave të Kosovës “G7” tha se: “Fuqizimi i grave në ekonomi është parakusht për zhvillim të qëndrueshëm socio-ekonomik të vendit. Gjithashtu ky fuqizim paraqet mënyrën më të mirë për shfrytëzimin e aftësive të tyre për të ndikuar ndjeshëm në zhvillimin ekonomik, uljen e varfërisë dhe rritjen e mirëqenies sociale”.

Ndërsa Ermira Kusari nga Shoqata e Grave e Biznesit “SHE-ERA” tha se gratë e suksesshme janë më se të nevojshme për Kosovën jo vetëm për hir të mirëqenies dhe statutit, por edhe për familjen, komunitetin dhe shoqërinë.

“Në përvojën e vet 16 vjeçare, SHE-ERA ka qenë pjesë aktive dhe është ballafaquar me sfida që vijnë nga ndryshimet në mjedisin afarist. Por, bashkëpunimi i sinqertë me gratë ambicioze, me partnerët vendor e të huaj e ka bërë punën tonë të frytshme”, deklaroi mes tjerash ajo.

Ayhan Albeyoglu, drejtori menaxhues i TEB-it, e konsideron të suksesshëm bashkëpunimin e organizatave dhe institucioneve për bashkimin e forcave për inkurajimin, mbështetjen dhe zhvillimin e Programit të Grave Ndërmarrëse në Kosovë.

Arton Celina, zëvendësdrejtor i Përgjithshëm i TEB-it tha se “Programi që ofrohet sjellë inovacione në qasjen ndaj Grave Ndërmarrëse në Kosovë. Një ndër karakteristikat kryesore janë fondet dhe prezantimi i ideve të Grave Ndërmarrëse komunitetit të biznesit si dhe dhënia e informatave dhe sugjerimeve rreth mjedisin e tregut”.

Ndryshe, gratë ndërmarrëse që ishin pjesë e Programit të Grave Ndërmarrëse dhe kishin mundësi për të qenë pjesë e trajnimit dhe për të përfituar nga programi këshillues i dizajnuar për gratë udhëheqëse.