Shaqiri, më i miri te Baseli

Ai fitoi me 66 për qind të votave, duke qenë bindshëm më i adhuruari te tifozët

Xherdan Shaqiri është shpallur lojtari më i mirë i Baselit për edicionin 2024/2025.

Ai fitoi me 66 për qind të votave. Baseli ka zgjedhur një mënyrë të veçantë t’i gëzojë shikuesit që kanë marrë pjesë në sondazh.

Baseli ka vendosur t’i dhurojë 25 fanella me ngjyrë ari të vendosura në kornizë dhe të nënshkruara nga ylli dhe kapiteni i Baselit, Xherdan Shaqiri.

Fanellat për shënimin e 131-vjetorit të themelimit të klubit, ishin shitur plotësisht, transmeton albinfo.ch.

Shaqiri fitoi titullin dhe Kupën me Baselin, duke kurorëzuar një edicion shumë të suksesshëm.

33-vjeçari u kthye te Baseli në gusht të vitit 2024.

Ai e mbylli edicionin 2024/2025 me 21 gola dhe 22 asistime në 39 ndeshje në Superligë dhe Kupë të Zvicrës.

Me Baselin ka kontratë deri në qershor të vitit 2027.

---