Austri: 11 të lënduar në aksidentin e rëndë me autobus në A1

pixabay

Një aksident i rëndë trafiku ndodhi të shtunën mbrëma në autostradën A1, pranë zonës së pushimit Schallaburg në rrethin e Melkut, ku një autobus me 55 pasagjerë u përplas me një kamion. Si pasojë e përplasjes, shoferi i autobusit u plagos rëndë, ndërsa dhjetë persona të tjerë pësuan lëndime të lehta, shkruaj ORF, transmeton albinfo.ch.

Sipas Philipp Gutlederer nga Shërbimi i Emergjencave i Austrisë së Poshtme, përplasja ndodhi pak para orës 21:00, për arsye ende të panjohura. Autobusi i mbushur me pasagjerë u përplas me pjesën e pasme të kamionit, duke shkaktuar dëme të mëdha në pjesën e përparme të automjetit.

Zjarrfikësit përdorën pajisje të rënda për të liruar shoferin, i cili ishte bllokuar në kabinën e dëmtuar. Atij iu dha ndihma e parë në vendngjarje dhe më pas u dërgua në spital në gjendje të rëndë. Ndërkaq, dhjetë pasagjerë të plagosur lehtë u transportuan në spitalet më të afërta për trajtim mjekësor, transmeton albinfo.ch.

Pasagjerët e tjerë, të cilët nuk u lënduan fizikisht, por përjetuan tronditje emocionale, u morën në kujdes nga Ekipi i Ndërhyrjes në Kriza i Kryqit të Kuq. Kujdesi psikosocial zgjati deri në mbërritjen e autobusëve zëvendësues, të cilët u angazhuan për t’i transportuar më tej udhëtarët.

Për shkak të aksidentit, autostrada A1 u mbyll përkohësisht në zonën e ngjarjes. Në operacionin e gjerë të shpëtimit u përfshinë disa njësi zjarrfikëse, policia e autostradave, si dhe ekipet e urgjencës së Austrisë së Poshtme.

Hetimet për shkaqet e aksidentit janë në vijim, transmeton albinfo.ch.