Gjermania deporton 81 afganë në fluturimin e parë nën qeverinë Merz

Ministria e Brendshme e Gjermanisë konfirmoi të premten se ka deportuar 81 shtetas afganë drejt vendit të tyre të origjinës, nëpërmjet një fluturimi të nisur nga aeroporti i Leipzigut. Ky është fluturimi i parë i riatdhesimit i realizuar nga qeveria e re e kancelarit Friedrich Merz, duke shënuar një kthesë të fortë në politikën e migracionit të Berlinit, shkruan DW, transmeton albinfo.ch.

Sipas deklaratës zyrtare, të deportuarit ishin të gjithë burra me precedent penal dhe të detyruar ligjërisht të largohen nga Gjermania. “Po zbatojmë një marrëveshje të rëndësishme nga marrëveshja e koalicionit – fillimin e deportimeve në Afganistan për personat që përbëjnë rrezik dhe kanë kryer krime,” tha Ministri i Brendshëm, Alexander Dobrindt.

Deklarata zbuloi se operacioni u realizua me mbështetje logjistike nga Katari, ndërsa fluturimi u krye nga Qatar Airways dhe u nis në orën 08:35 të mëngjesit sipas kohës lokale, transmeton albinfo.ch.