Talenti shqiptar pranë transferimit drejt Luzernit

Mesfushori i talentuar shqiptar, Demir Xhemalija, pritet që së shpejti të ndërrojë ambient, teksa është në bisedime të avancuara për t’u transferuar te skuadra e Luzernit. 19-vjeçari aktualisht është pjesë e ekipit U21 të Baselit në Zvicër, por duket se është gati për një hap të ri në karrierën e tij, transmeton albinfo.ch.

Sipas të përditshmes zvicerane “Blick”, Xhemalija është shumë pranë kalimit te Luzerni, një skuadër që garon në elitën e futbollit zviceran. Edhe pse ende nuk ka debutuar me ekipin e parë të Baselit, ai ka tërhequr vëmendjen e disa klubeve me paraqitjet e tij të qëndrueshme në ekipin U21.

Në edicionin 2024/25, mesfushori me tipare defensive ka zhvilluar 16 ndeshje me Baselin U21, ku ka kontribuar edhe me një gol. Performanca e tij në mesfushë është vlerësuar si premtuese nga ekspertët e futbollit zviceran.

Përveç nivelit të klubeve, Xhemalija ka përfaqësuar edhe Zvicrën në grupmoshat U16, U17 dhe U19, duke treguar potencial të madh për të qenë pjesë e së ardhmes së futbollit evropian.

Muajin e kaluar, talenti shqiptar ishte në qendër të vëmendjes edhe nga Federata e Futbollit të Kosovës. Presidenti Agim Ademi është takuar me të dhe ka publikuar një fotografi në rrjetet sociale, duke sinjalizuar interesimin e Kosovës për ta përfshirë në projektin e saj kombëtar.

Nëse transferimi drejt Luzernit konkretizohet, Demir Xhemalija mund të bëjë hapin e parë drejt futbollit profesionist në një nivel më të lartë, dhe ndoshta të hapë dyert edhe për përfaqësimin në një prej përfaqësueseve kombëtare shqiptare, transmeton albinfo.ch.