Hamburg: Shfaqje mahnitëse nga Elbenita Kajtazi dhe Granit Musliu

Sopranoja Kajtazi dhe tenori Musliu mahnitin publikun gjerman

Një mbrëmje e jashtëzakonshme muzikore u zhvillua në Staatsoper Hamburg, ku publiku pati mundësinë të përjetojë një performancë të veçantë nga dy yje të muzikës operistike shqiptare, sopranoja e njohur Elbenita Kajtazi dhe tenori i talentuar Granit Musliu, shkruan albinfo.ch.

Elbenita Kajtazi, një nga zërat më të spikatur në skenat ndërkombëtare, ndau emocionet e saj pas performancës duke vlerësuar debutimin e Musliut në rolin e Fentonit, nga opera “Falstaff” e Giuseppe Verdit. Në një postim të ndjerë, ajo u shpreh:

“Sot pata kënaqësinë të ndaj skenën me tenorin tonë të mrekullueshëm Granit Musliun, i cili sapo bëri debutimin e tij me rolin e Fenton nga Opera Falstaff. Jam krenare që dikur kam pasur mundësinë ta mbështes në hapat e parë të rrugëtimit të tij artistik, dhe akoma më krenare që sot e shoh të shkëlqejë. Urime për këtë arritje të merituar i dashur Granit!”

Ky bashkëpunim artistik jo vetëm që vlerësoi talentin dhe punën e dy artistëve, por edhe dëshmoi fuqinë e artit shqiptar në skenat më prestigjioze evropiane.

Publiku në Hamburg e priti performancën me duartrokitje të gjata, duke konfirmuar edhe njëherë suksesin dhe nivelin e lartë profesional të këtyre artistëve./Albinfo.ch

---