Komenti i një tifozi bëhet viral: Xhaka është legjenda e Sunderlandit

Efekti Xhaka, Sunderland ngjitet në krye të tabelës

Sunderland ka nisur sezonin më mbresëlënës të dekadës, duke u ngjitur në krye të tabelës pas disa ndeshjeve të para, dhe emri që përmendet më së shumti është ai i Granit Xhakës, transmeton albinfo.ch.

Mesfushori 32-vjeçar, i transferuar këtë verë nga Bayer Leverkusen për 17.3 milionë euro, ka sjellë menjëherë stabilitet, lidership dhe një nivel të ri loje te “Black Cats”. Pas paraqitjeve të tij të para, tifozët janë të bindur se prania e Xhakës është arsyeja kryesore pse skuadra po renditet ndër ekipet më të forta të kampionatit.

Dean Hudson, tifoz i vjetër i Sunderlandit, e shprehu hapur këtë ndjenjë:

“Jam 35-vjeçar. E shikoj Sunderlandin qysh nga mosha 8-vjeçare. Mendoj se Granit Xhaka është lojtari më i mirë që ka luajtur ndonjëherë për këtë klub.”

Ky koment që fillimisht dukej i ekzagjeruar, tani është bërë fraza simbolike për tifozët. Për shumë prej tyre, Xhaka nuk është vetëm një transferim i madh, por njeriu që po e ringjall historinë e klubit.

Pas një sezoni historik me Bayer Leverkusenin, ku ndihmoi klubin gjerman të fitojë titullin e parë të Bundesligës, Xhaka duket se e ka sjellë të njëjtin shpirt fitues edhe në Stadium of Light.

Nëse Sunderland arrin të mbajë këtë formë, atëherë Xhaka jo vetëm që do të kujtohet si njëri ndër lojtarët më të mirë që ka veshur fanellën e kuqe e të bardhë, por edhe si simboli i kthimit të klubit në majat e futbollit. /Albinfo.ch.

---