Unia bën thirrje për ndalimin e punës së të dielës

Unia dëshiron të ndalojë zgjerimin e punës së të dielës. Sipas saj parlamenti duhet ta mbrojë të dielën si një ditë pushimi

Delegatët e sindikatës më të madhe zvocerane, Unia kanë përfunduar sot kongresin e tyre tre-ditor në Brig, në kantonin e Valisit. Ata kanë miratuar disa deklarata mbi çështjet e punës dhe të politikës sociale.

Unia dëshiron të ndalojë zgjerimin e punës së të dielës, transmeton albinfo.ch. Sindikalistët argumentojnë se nuk duhet të lejohet më shumë blerje të dielave, pasi kjo bie ndesh me vullnetin e popullit dhe rrezikon shëndetin e punonjësve.

Sipas Unias, parlamenti duhet ta mbrojë të dielën si një ditë pushimi, pra ditë pa punë, shkruan srf.ch.

Aktualisht në axhendën politike janë më shumë të diela kur dyqanet duhet të punojnë. Puna e përditshme në shitje karakterizohet tashmë nga stresi, paga të ulëta dhe orare pune të parregullta.

Megjithatë, partitë e qendrës dhe punëdhënësit po kërkojnë më shumë shitje të së dielës: dymbëdhjetë në vend të katër që janë aktualisht në vit. Kjo bie ndesh me vullnetin e popullit dhe rrezikon shëndetin e punonjësve.

---