Asllani po shkëlqen në Hoffenheim

Fisnik Asllani, që është golashënuesi i tretë më i mirë në Bundesligë, është shprehur shumë i lumtur për fitoren

Futbollisti i Kosovës, Fisnik Asllani po e vazhdon shkëlqimin në Bundesligë.

Të shtunën shënoi supergol në fitoren 3:1 të Hoffenheimit ndaj Heidenheimit javën e tetë të Bundesligës, ndërsa për Hoffenheimin ishte fitorja e parë këtë edicion në shtëpi.

Asllani, tani ka pesë gola e një asistim në tetë paraqitje. Pos Asllanit, te Hoffenheimi startuan edhe Albian Hajdari në qendër të mbrojtjes dhe Leon Avdullahu në mesfushë. Hajdari po ashtu kishte ndeshje të mirë, ndërsa u vlerësua edhe paraqitja e Avdullahut.

Asllani, që është golashënuesi i tretë më i mirë në Bundesligë, është shprehur shumë i lumtur për fitoren, transmeton albinfo.ch.

“Ndihem mirë për golin, por edhe më mirë për fitoren”, ka thënë Asllani për faqen zyrtare të Hoffenheimit. Atë e gëzon fakti që fitorja më në fund u arrit në ndeshjet në shtëpi.

“Të gjithë jemi shumë të lumtur që më në fund morëm tri pikë në shtëpi. Tani duam të ndërtojmë në këtë, së pari në ndeshjen për kupë e më pas në Bundesligë. Ne kemi reaguar shpejtë kur shënova golin. Më vjen mirë që topi përfundoi në rrjetë. Shumë punë është bërë në këtë ekip. Këtë herë jemi shpërblyer”, ka shtuar Asllani.

Ai tashmë është i rëndësishëm edhe te Kosova. Ka shënuar golin e fitores ndaj Suedisë. Por po shfaqet i suksesshëm edhe në Bundesligë, njërën prej ligave më të forta në botë.

“Ne të gjithë po shtyjmë para së bashku dhe për këtë është shumë kënaqësi. Ju mund ta shihni këtë në rezultate – për këtë gjërat po shkojnë kaq mirë”, ka theksuar Asllani.

 

---