Alan Shearer e quan “kryevepër” paraqitjen e Granit Xhakës

Shearer lavdëron Xhakën: “Kryevepër në mesfushë”

Legjenda angleze e futbollit, Alan Shearer, e ka vlerësuar si “kryevepër” dhe “sensacionale” paraqitjen e Granit Xhakës në fitoren e Sunderlandit ndaj Chelseat, përcjell albinfo.ch.

Shearer, golashënuesi më i mirë në historinë e Premier Leagues, e ka përfshirë mesfushorin shqiptar në ekipin më të mirë të xhiros së nëntë.

Sipas Premier League, Xhaka ishte “në zemër të rikthimit të pabesueshëm” të Sunderlandit në “Stamford Bridge”, duke dominuar mesfushën dhe ndihmuar skuadrën të fitojë 2:1.

“Ka ofruar kryevepër në mesfushë. Ishte në një nivel tjetër, duke e mbajtur topin në lëvizje dhe duke penguar disa sulme të Chelseat,” shkroi Shearer.

Xhaka, që mban shiritin e kapitenit te Sunderland, po udhëheq skuadrën e rikthyer në elitë drejt një sezoni mbresëlënës – aktualisht në vendin e katërt në Premier League.

---