Harry Bajraktari nderohet me Urdhrin e Lirisë nga Presidentja Vjosa Osmani

Sot, Presidentja e Republikës së Kosovës, Vjosa Osmani, dekoroi Harry Bajraktari me Urdhrin e Lirisë, duke e vlerësuar për kontributin e tij të jashtëzakonshëm në lirinë, pavarësinë dhe shtetndërtimin e Kosovës.

Presidentja Osmani theksoi rolin e Bajraktarit gjatë dekadave të fundit: “Për më shumë se tri dekada, z. Bajraktari ka qenë një nga zërat më të fuqishëm të Kosovës në Shtetet e Bashkuara të Amerikës. Qysh në vitet e hershme ka bashkëpunuar ngushtë me Presidentin historik Ibrahim Rugova dhe ka përfaqësuar kauzën e Kosovës në një periudhë tepër të ndjeshme.”

Presidentja Osmani gjithashtu kujtoi angazhimin e tij për Ushtrinë Çlirimtare të Kosovës dhe për komunitetin shqiptaro-amerikan: “Ai ka ndërtuar ura të rëndësishme bashkëpunimi me Shtëpinë e Bardhë, Kongresin amerikan dhe udhëheqës të tjerë në SHBA, duke mbështetur Kosovën në momentet vendimtare dhe duke qëndruar krah popullit tonë.”

Harry Bajraktari u shpreh falënderues për nderimin dhe përkushtimin e vazhdueshëm ndaj vendit të tij.