Përkundër shiut, ndeshja Kosova-Zvicra do të zhvillohet

Federata e Futbollit të Kosovës ka publikuar një video, ku shihet qartë se gjendja e fushës është e mirë

Përgatitjet për ndeshjen e sotme mes Kosovës dhe Zvicrës në “Fadil Vokrri” po zhvillohen normalisht, pavarësisht reshjeve të mëdha të shiut që kanë goditur Prishtinën gjatë ditës.

Federata e Futbollit të Kosovës ka publikuar një video, ku shihet qartë se gjendja e fushës është e mirë dhe e përshtatshme për lojë, pa grumbullime uji apo dëmtime të sipërfaqes.

Ndeshja, që luhet sonte prej orës 20:45, është e fundit në kuadër të kualifikimeve për Kupën e Botës 2026, teksa të dy ekipet mbajnë ende një shans teorik për ta fituar grupin.

Pamjet nga stadiumi konfirmojnë se kushtet janë të favorshme dhe fusha është plotësisht e gatshme të presë sfidën e shumëpritur. Atmosfera pritet të jetë e zjarrtë.

 

---