Kosova ngjitet në skenën e Vatikanit me një performancë madhështore

Prezantim i jashtëzakonshëm i Filharmonisë së Kosovës në Jubileun e Vatikanit

Në një mbrëmje solemne arti dhe spiritualiteti, Filharmonia e Kosovës dha një koncert të paharrueshëm në Bazilikën historike Santa Maria in Aracoeli në Romë, si pjesë e aktiviteteve të Jubileut në Vatikan, në bashkëpunim me Fondacionin Domenico Bartolucci. Në këtë tempull të muzikës sakrale, Orkestra dhe Kori i Filharmonisë së Kosovës, së bashku me Korin e Operës së Kosovës, sollën një interpretim të nivelit të lartë, duke dëshmuar fuqinë artistike të institucioneve tona kulturore, përcjell albinfo.ch.

Nën dirigjimin e maestros italian Jacopo Sipari di Pescasseroli, u interpretua oratoriumi madhështor “La Tempesta sul Lago” i kompozitorit të njohur Domenico Bartolucci. Solistët Besa Llugiqi, Ivana Hoxha, Carlos Cardoso dhe Biagio Pizzuti e pasuruan veprën me vokalin dhe interpretimin e tyre të shkëlqyer, duke i dhënë koncertit një dimension të veçantë artistik.

Në skenë u ngjitën 138 muzikantë, të cilët me përkushtim dhe profesionalizëm krijuan një harmoni të fuqishme mes korit, orkestrës dhe solistëve – një performancë që u prit me vlerësime të larta nga publiku dhe të ftuarit.

Në këtë aktivitet morën pjesë personalitete të shquara të politikës, kulturës dhe diplomacisë, mes tyre edhe kryeministri Albin Kurti, i cili vlerësoi prezencën e Filharmonisë së Kosovës në një nga qendrat më të rëndësishme të kulturës botërore.

Ky projekt u realizua me mbështetjen financiare të Ministrisë së Kulturës, Rinisë dhe Sportit, si pjesë e angazhimit për promovimin ndërkombëtar të artit dhe kulturës shqiptare, duke dëshmuar se Kosova ka një zë të denjë për skenat më prestigjioze të botës.

---