Ndihma humanitare e Kosovës mbërrin në Gaza dhe nis shpërndarja për familjet në nevojë

Ndihma humanitare e ndarë nga Qeveria e Republikës së Kosovës për popullin e Gazës ka mbërritur në destinacion dhe ka nisur menjëherë të shpërndahet për familjet në nevojë, ka bërë të ditur të dielën ministrja në detyrë e Punëve të Jashtme, Donika Gërvalla-Schwarz.

“Dje pasdite morëm konfirmimin se ndihma humanitare e ndarë nga Qeveria e Republikës së Kosovës, e dedikuar për popullin e Gazës, ka mbërritur në Gaza dhe menjëherë ka nisur shpërndarja për familjet në nevojë, përmes partnerëve humanitarë në terren”, ka shkruar Gërvalla-Schwarz në një postim në Facebook.

Ajo ka theksuar se dërgesa, në vlerë prej rreth 500 mijë eurosh, përfshin tenda, pako ushqimore, batanije si dhe 158 mijë racione të ushqimit të ngrohtë.

Ministrja në detyrë ka shprehur gjithashtu mirënjohjen e saj për mbështetjen ndërkombëtare që mundësoi realizimin e këtij operacioni humanitar. “Shpreh mirënjohjen time të sinqertë për Republikën e Turqisë dhe Gjysmëhënën e Kuqe Turke për bashkëpunimin dhe mbështetjen që e bënë të mundur këtë operacion humanitar”, ka shkruar ajo.