Amir Rrahmani rinovon kontratën me Napolin deri në vitin 2029

Rrahmani zgjat kontratën me kampionin e Italisë

Kapiteni i Kosovës, Amir Rrahmani, ka vazhduar kontratën me kampionin e Italisë, Napolin, duke u lidhur me klubin napolitan deri në vitin 2029, përcjell albinfo.ch.

Lajmi është konfirmuar nga burime të afërta me lojtarin, ndërsa zyrtarizimi nga klubi pritet në ditët në vijim. Rrahmani ka pasur oferta nga Arabia Saudite, Turqia dhe Premier League angleze, por ka vendosur të vazhdojë qëndrimin në Napoli, ku është shndërruar në një nga shtyllat kryesore të mbrojtjes.

Sipas raportimeve nga Italia, me kontratën e re, mbrojtësi qendror do të përfitojë rreth 3.8 milionë euro në vit. Bisedimet për rinovim kishin nisur që nga vera e vitit të kaluar.

Rrahmani ishte pjesë e ekipit më të mirë të Serie A në sezonin 2024/2025 dhe luajti rol kyç në fitimin e titullit të kampionit nga Napoli. Ai ka fituar me napolitanët edhe titullin e sezonit 2022/2023 dhe Superkupën e Italisë.

31-vjeçari, i cili karrierën e nisi në Kosovë dhe Shqipëri, vazhdon të vlerësohet lart nga trajneri Antonio Conte dhe nga mediat italiane, ndërsa mbetet figurë kyçe edhe për përfaqësuesen e Kosovës, me të cilën synon kualifikimin në Kupën e Botës 2026.

---