Borë dhe ngrica në Kosovë, thirrje për për kujdes gjatë vozitjes

Instituti Hidrometeorologjik i Kosovës (IHMK) ka njoftuar se në ditët në vijim pritet një ndryshim i theksuar i kushteve meteorologjike, me rënie të ndjeshme të temperaturave dhe reshje bore në pjesë të ndryshme të vendit.

Sipas IHMK-së, era do të ndryshojë drejtimin nga juglindja në veri dhe veriperëndim, duke favorizuar depërtimin e masave ajrore të ftohta me origjinë veriore.

Instituti paralajmëron se temperaturat minimale do të zbresin nën zero gradë Celsius, veçanërisht gjatë natës dhe orëve të hershme të mëngjesit, duke krijuar kushte për formimin e ngricave në rrugë, trotuare, ura dhe zona me lagështi të lartë.

“Ngricat, të kombinuara me shtresat e borës dhe erërat e ftohta, pritet të ndikojnë negativisht në sigurinë e qarkullimit rrugor. Vështirësi më të theksuara në komunikacion pritet të ketë në rrugët malore, akset dytësore dhe zonat me reliev të thyer, ku mund të ndodhin rrëshqitje dhe ngrirje e shpejtë e sipërfaqeve rrugore”, thuhet në njoftim.

Për këtë arsye, IHMK-ja rekomandon që autoritetet përgjegjëse për mirëmbajtjen e rrugëve të jenë në gatishmëri të shtuar, ndërsa qytetarët dhe pjesëmarrësit në trafik të përdorin pajisje dimërore, të respektojnë distancën e sigurisë dhe të përshtatin shpejtësinë me kushtet e rrugës.