Lorisi renditet i pari në botë në Olimpiadën Ndërkombëtare të Matematikës

Loris Qosja mposhti të gjithë nxënësit nga shumë shtete të botës në matematikë

Një arritje e jashtëzakonshme vjen nga Cërriku, duke e vendosur këtë qytet në hartën e ekselencës akademike shqiptare. Nxënësi Loris Qosja është renditur i pari në botë në Olimpiadën Ndërkombëtare të Matematikës për klasat e nënta, ndërkohë që ka siguruar edhe vendin e tretë në Olimpiadën e Kimisë, duke shënuar një sukses të rrallë në arenën ndërkombëtare, shkruan albinfo.ch.

Vlen të theksohet se Lorisi është nxënës i shkollës “7 Marsi” në Cërrik dhe ka përfaqësuar Shqipërinë në olimpiadën “Neo Science Olympiad”, e organizuar në Orlando të Shteteve të Bashkuara të Amerikës. Në këtë kompeticion prestigjioz, ai u shpall fitues i vendit të parë në Matematikë dhe i vendit të tretë në Kimi, duke konkurruar me nxënës nga dhjetëra vende të botës.

Suksesi i tij ka ngjallur reagime të shumta pozitive edhe në nivel institucional. Kryeministri i Shqipërisë, Edi Rama, ka përgëzuar publikisht Loris Qosjen, duke vlerësuar talentin, pasionin dhe punën e tij të palodhur, si edhe përkushtimin e mësueses Flutura. Sipas kryeministrit, këto dy medalje janë një arsye krenarie jo vetëm për familjen dhe shkollën e Lorisit, por për të gjithë nxënësit shqiptarë, shkruan tutje albinfo.ch.

Ndërkohë, në të gjithë vendin vijojnë olimpiadat në fusha të ndryshme si matematika, fizika, kimia, biologjia dhe disiplina të tjera shkencore, ku vazhdimisht dalin në pah talente të rinj që dëshmojnë potencialin e lartë të arsimit shqiptar. Rasti i Loris Qosjes shërben si shembull frymëzues për brezat e rinj dhe si dëshmi se puna dhe përkushtimi mund të çojnë në rezultate të jashtëzakonshme edhe në skenën ndërkombëtare. /Albinfo.ch

 

---