Labearta Hasanramaj specializon në SHBA dhe bën shqiponjën me duar

Shqiptarja përfundon specializimin në Menaxhment dhe Administratë Publike në SHBA

Bëhet fjalë për Labearta Hasanramaj nga Strellci i Epërm, Komuna e Deçanit, ku ka përfunduar me sukses specializimin në Menaxhment dhe Administratë Publike në Shtetet e Bashkuara të Amerikës, shkruan albinfo.ch.

Gjatë programit, ajo ka përvetësuar njohuri të avancuara në menaxhimin institucional, administratën publike, qeverisjen e mirë dhe politikat publike, fusha kyçe për zhvillimin e institucioneve moderne.

Gjatë qëndrimit në SHBA, Labearta ka përfaqësuar Kosovën në universitete, organizata të shoqërisë civile dhe forume ndërkombëtare, duke prezantuar rolin dhe fuqinë e grave kosovare. Ajo ka diskutuar për pjesëmarrjen e grave në institucione, kontributin e tyre gjatë luftës, sfidat dhe qëndresën që kanë dëshmuar ndër vite.

Sipas saj, ky angazhim ka qenë një përgjegjësi personale dhe profesionale, për të promovuar realitetin dhe vlerat e grave kosovare në arenën ndërkombëtare. Labearta njoftoi se së shpejti do të kthehet në Kosovë për të vazhduar angazhimin profesional, duke theksuar se njohuritë e fituara duhet të shërbejnë për fuqizimin e zërit të gjeneratave të reja.

Arritja e saj konsiderohet një shembull përkushtimi dhe punë të vazhdueshme nga të rinjtë kosovarë, ndërsa familjarët, miqtë dhe bashkëvendësit i kanë uruar suksese të mëtejshme në karrierën dhe shërbimin ndaj vendit./Albinfo.ch.

---