House of Kosova në Davos: Diplomaci aktive gjatë ditës, tinguj rok në mbrëmje

Tingujt e Kosovës në Davos: “Asgjë Sikur Dielli” performon në House of Kosova

Në Davos të Zvicrës, ku po zhvillohen takime të nivelit më të lartë ndërkombëtar me pjesëmarrjen e përfaqësuesve nga pothuajse të gjitha shtetet e botës, Kosova po përfaqësohet përmes platformës së saj të veçantë, House of Kosova, shkruan albinfo.ch.

Për tri ditë me radhë, në këtë hapësirë janë mbajtur takime të shumta dhe të rëndësishme me personalitete të ndryshme politike, ekonomike dhe institucionale nga mbarë bota. Kryeministri në detyrë i Republikës së Kosovës, Albin Kurti, ka zhvilluar një sërë takimesh me përfaqësues të shteteve të ndryshme, duke shfrytëzuar House of Kosova si një pikë kyçe për dialog, bashkëpunim dhe prezantim të interesave të Kosovës në arenën ndërkombëtare.

Përveç agjendës intensive diplomatike dhe ekonomike gjatë ditës, House of Kosova solli edhe një dimension kulturor në mbrëmje. Në një atmosferë të veçantë, u organizua një mbrëmje muzikore live rok, duke ofruar një përzierje të diplomacisë dhe artit, shkruan tutje albinfo.ch.

Grupi i njohur nga Prishtina, “Asgjë Sikur Dielli”, solli në skenën e Davosit tingujt e rock-ut alternativ urban të Kosovës. Me performancën e tyre, ata prezantuan anën kreative dhe moderne të vendit, duke tërhequr vëmendjen e pjesëmarrësve ndërkombëtarë dhe mysafirëve të shumtë.

Mbrëmja muzikore dëshmoi se House of Kosova nuk është vetëm një hapësirë për takime politike e ekonomike, por edhe një platformë për promovimin e kulturës, artit dhe identitetit bashkëkohor të Kosovës në skenën globale./Albinfo.ch

 

---