SHBA-të gati për negociata tarifore me Zvicrën

(KEYSTONE/Christian Beutler)

Shtetet e Bashkuara janë të gatshme të hapin negociata tarifore me Zvicrën, ka deklaruar presidenti i Konfederatës Zvicerane, Guy Parmelin, gjatë Forumit Ekonomik Botëror në Davos.

“Amerikanët na kanë informuar se janë të gatshëm”, tha Parmelin para mediave, duke sqaruar se deklarata e përbashkët e miratuar në nëntor mbetet baza e negociatave dhe se nuk janë vendosur kushte paraprake. Ai shtoi se nëse ky kuadër ndryshon, procesi mund të vonohet.

Sipas ministrit zviceran të Ekonomisë, raundi i parë i negociatave teknike për marrëveshjen tarifore mes Bernës dhe Uashingtonit pritet të mbahet sa më shpejt në Bernë, megjithëse ende nuk ka një datë të saktë. Zvicra synon të arrijë një marrëveshje deri në fund të marsit për të siguruar tarifat prej 15% që janë në fuqi që nga nëntori, transmeton albinfo.ch.

Mbështetje për Ukrainën

Në Davos, Parmelin u takua gjithashtu për herë të parë personalisht me presidentin ukrainas Volodymyr Zelensky, duke konfirmuar se Zvicra planifikon të mbështesë Ukrainën përballë krizës energjetike.

“Situata është kritike. Ka zona ku shtëpitë nuk po ngrohen më”, tha Parmelin, duke shtuar se pala ukrainase ka paraqitur një listë kompanish zvicerane të sektorit energjetik që mund të ndihmojnë me pajisje të nevojshme. “Do të bëjmë gjithçka që mundemi për të përshpejtuar dërgesat”, u shpreh ai.

Zelensky dhe Trump në Davos

Presidenti ukrainas Volodymyr Zelensky u takua në Davos me presidentin amerikan Donald Trump, duke e cilësuar bisedën si “të mirë”. Pas takimit, Trump i bëri thirrje Rusisë që t’i japë fund luftës në Ukrainë, ndërsa Zelensky deklaroi se dokumentet për përfundimin e konfliktit janë “pothuajse gati”.

Në fjalimin e tij në Forumin Ekonomik Botëror, Zelensky kritikoi mungesën e vullnetit politik të Bashkimit Evropian ndaj Vladimir Putinit, duke theksuar se garancitë e sigurisë nuk mund të funksionojnë pa përfshirjen e SHBA-ve.

Trump nënshkruan Kartën e “Këshillit të Paqes”

Gjatë qëndrimit të tij në Davos, Donald Trump nënshkroi kartën themeluese të “Këshillit të Paqes”, një strukturë që, sipas tij, do të funksionojë “në koordinim me Kombet e Bashkuara”. Pas ceremonisë, presidenti amerikan u largua nga Zvicra drejt aeroportit të Cyrihut.