Opozitarja bjelloruse merr Kosovën si shembull të lirisë dhe prosperitetit

Opozitarja bjelloruse merr Kosovën si shembull të lirisë dhe prosperitetit: Rrugëtim i këtij shteti i jashtëzakonshëm

Opozitarja bjelloruse, Sviatlana Tsikhanouskaya, ka vlerësuar Kosovën si shembull të lirisë dhe prosperitetit, duke e cilësuar rrugëtimin e saj si të jashtëzakonshëm. Ajo këtë vlerësim e bëri pas një takimi me Presidenten e Kosovës, Vjosa Osmani, në kuadër të Forumit Ekonomik Botëror që po mbahet në Davos të Zvicrës, përcjell albinfo.ch. 

Tsikhanouskaya njoftoi për takimin përmes një postimi në rrjetin social X (ish-Twitter), ku theksoi rëndësinë e përvojës së Kosovës dhe mbështetjen që ky shtet ka dhënë për popullin e Bjellorusisë.

“Rrugëtimi i jashtëzakonshëm i Kosovës tregon se si guximi, qëndrueshmëria dhe solidariteti ndërkombëtar mund të çojnë drejt lirisë dhe prosperitetit. Ne e vlerësojmë mbështetjen e vazhdueshme të Kosovës për popullin e Bjellorusisë”, ka shkruar Tsikhanouskaya.

Sviatlana Tsikhanouskaya është figura kryesore e opozitës bjelloruse dhe udhëheqësja simbolike e rezistencës kundër regjimit të presidentit Aleksandër Lukashenko. Ajo u bë e njohur ndërkombëtarisht gjatë zgjedhjeve presidenciale të vitit 2020, pasi bashkëshorti i saj, Siarhei Tsikhanouski, u arrestua dhe iu ndalua kandidimi.

Zgjedhjet e vitit 2020 u konsideruan të manipuluara nga vëzhguesit ndërkombëtarë, duke nxitur protesta masive në mbarë Bjellorusinë. Pas këtyre zhvillimeve, Tsikhanouskaya u detyrua të largohej nga vendi dhe që atëherë vepron nga mërgimi, duke përfaqësuar opozitën bjelloruse në arenën ndërkombëtare.

Ndryshe, pavarësisht vlerësimeve të shprehura, Bjellorusia zyrtarisht nuk e njeh shtetin e Kosovës. /Albinfo.ch 

---