Kurti në Davos fton Kuvajtin për investime në energji, ujë dhe infrastrukturë

Kosova fton Kuvajtin për thellim të bashkëpunimit ekonomik në Davos

Kryeministri i Kosovës, Albin Kurti, ka zhvilluar një takim në Shtëpinë e Kosovës në Davos me Dr. Sabeeh Al-Mukhaizeem, ministër i Energjisë Elektrike, Ujit dhe Energjisë së Ripërtërishme të Kuvajtit, njëherësh ministër në detyrë i Financave dhe ministër i Shtetit për Çështjet Ekonomike dhe Investimet, transmeton albinfo.ch.

 

 

Gjatë takimit, Kurti ka shprehur mirënjohje për mbështetjen e vazhdueshme të Kuvajtit ndaj Kosovës, duke e cilësuar atë partner të rëndësishëm në proceset zhvillimore të vendit.

Ai theksoi se kjo mbështetje përbën një bazë të fortë për thellimin e bashkëpunimit ekonomik dhe rritjen e investimeve, veçanërisht në sektorë strategjikë si energjia, uji dhe infrastruktura.

 

Sipas Kurtit, qeveria synon të realizojë projekte madhore zhvillimore, përfshirë ndërtimin e digave, hekurudhave, stadiumeve dhe zgjerimin e kapaciteteve energjetike, të cilat do të ndikojnë në rritjen ekonomike dhe forcimin e sigurisë energjetike.

 

 

Takimi u zhvillua në kuadër të Forumit Ekonomik Botëror në Davos, ku Kosova po zhvillon takime me përfaqësues të lartë shtetërorë dhe investitorë ndërkombëtarë./Albinfo.ch

 

---