Kosovë: Kuvendi miratoi rezolutën për ish-krerët e UÇK-së në Hagë, LDK nuk merr pjesë në votim

Kuvendi i Kosovës ka votuar sot pro rezolutës së iniciuar nga Partia Demokratike e Kosovës, e cila ka të bëjë me mbështetjen për ish-drejtuesit e UÇK-së që po përballen me gjykim në Hagë.

Dokumenti u miratua me 90 vota pro, një kundër dhe asnjë abstenim, duke siguruar përkrahje të gjerë në sallë.

Megjithatë, gjatë votimit u vu re se deputetë të Lidhjes Demokratike të Kosovës, ndonëse ishin të pranishëm në seancë, nuk morën pjesë në procesin e votimit për këtë çështje. Kjo pasi ata kërkuan që në kuadër të kësaj rezolute të përfshihej edhe çështja e vrasjeve të pasluftës, por që e njejta nuk u përfshi në tekst.

Përmes kësaj rezolute tashmë të miratuar, Kuvendi rikonfirmon përkushtimin për mbrojtjen e vlerave të luftës çlirimtare dhe bën thirrje për drejtësi të paanshme në proceset që po zhvillohen në Dhomat e Specializuara në Hagë.