IKSHPK konfirmon: Ky është lloji i gripit që po qarkullon në Kosovë

Instituti Kombëtar i Shëndetësisë Publike të Kosovës (IKSHPK) ka realizuar sekuencimin e plotë të gjenomit të virusit të Gripit A, duke përdorur teknologjinë më të fundit. Ky proces lejon monitorimin e saktë të llojeve të virusit dhe vlerësimin e efektivitetit të vaksinave ekzistuese.

Rezultatet tregojnë se në Kosovë dominon nën tipi H3N2, që përbën mbi 80% të mostrave të analizuar. Mostrat e mbetura (rreth 18%) i përkasin virusit të Gripit A/H1N1. Të gjitha sekuencat H3N2 të analizuar i përkasin “clade K”, i cili tashmë gjendet në të gjitha kontinentet dhe përfaqëson rreth gjysmën e sekuencave evropiane në bazën globale GISAID. Sipas të dhënave aktuale, ky virus ka një divergjencë të konsiderueshme gjenetike nga shtami i përdorur në vaksinën aktuale të hemisferës veriore.