Nxënësit shqiptarë kremtojnë 18-vjetorin e Pavarësisë në Schwäbisch Gmünd

Festë dhe krenari për 18-vjetorin e Pavarësisë në Schwäbisch Gmünd

Me rastin e 18-vjetorit të Pavarësisë së Kosova, në Schwäbisch Gmünd u organizua një aktivitet festiv nga shkollat shqipe “Ardhmëria” dhe “Naim Frashëri” në Schorndorf, shkruan albinfo.ch.

Në ngjarje mori pjesë edhe diplomatja Shpresa Rama Iseni, e cila përgëzoi organizatorët dhe nxënësit për përkushtimin e tyre dhe nënvizoi rëndësinë e ruajtjes së gjuhës shqipe dhe trashëgimisë kulturore, sidomos për brezat që rriten jashtë atdheut.

Nxënësit dhuruan këngë dhe recitime plot emocion, duke krijuar një atmosferë të ngrohtë dhe krenare, ndërsa mësueset Egzona Mustafa dhe Shkurte Krasniqi u vlerësuan për organizimin e shkëlqyer të festës.

Në përmbyllje u bë thirrje që prindërit të vazhdojnë të mbështesin mësimin plotësues të gjuhës shqipe, duke regjistruar fëmijët e tyre në këto shkolla, për të ruajtur dhe forcuar identitetin kombëtar brez pas brezi./Albinfo.ch.

---