Kosova feston 18-vjetorin e Pavarësisë në Berlin me një mbrëmje solemne

Ambasada e Kosovës organizon pritje madhështore në Rotes Rathaus, me rreth 400 të ftuar nga trupi diplomatik dhe politika gjermane

Mbrëmë, në Berlin u festua 18-vjetori i Pavarësisë së Republikës së Kosovës me një organizim të madh nga Ambasada e Republikës së Kosovës në Gjermani, transmeton albinfo.ch.

Ngjarja u mbajt në ambientet prestigjioze të Rotes Rathaus, ndërtesa historike në zemër të Berlinit, e cila shërben si seli e Kryetarit Qeverisës të Berlinit dhe e qeverisë së qytetit. Një hapësirë përfaqësuese ku organizohen vetëm ngjarje të veçanta shtetërore dhe diplomatike, duke i dhënë kështu festës një dimension edhe më të lartë institucional.

Në këtë mbrëmje solemne morën pjesë rreth 400 mysafirë, përfshirë deputetë gjermanë, përfaqësues të ambasadave të ndryshme, si dhe Zëvendëskryeministri i Kosovës, Ministri i Jashtëm Glauk Konjufca.

Organizimi dhe niveli i përfaqësimit u vlerësuan si dëshmi e seriozitetit dhe dinjitetit me të cilin Kosova prezantohet në arenën ndërkombëtare. Momente të tilla jo vetëm që forcojnë imazhin institucional të shtetit, por edhe theksojnë përparimin dhe konsolidimin diplomatik të Kosovës.

Një falënderim i veçantë iu drejtua Ambasadorit Faruk Ajeti dhe stafit të ambasadës për organizimin e kësaj mbrëmjeje historike, e cila shënoi në mënyrë dinjitoze 18-vjetorin e shtetit të Kosovës në kryeqytetin gjerman./Albinfo.ch

---