Përmes avio-biletave dyshohet se u shpëlan mbi 2 milionë euro, një person në pranga në Kosovë

Një person është arrestuar nga Policia e Kosovës nën dyshimin për shpëlarje parash në vlerë mbi 2 milionë euro, pas një hetimi të zhvilluar në bashkëpunim me Prokurorinë Speciale.

Aksioni policor është realizuar të martën nga Drejtoria për Hetimin e Krimeve Ekonomike dhe Korrupsionit, pas hetimeve disa vjeçare ndaj gjashtë të dyshuarve kosovarë, të cilët dyshohet se në bashkëveprim kanë kryer veprën penale të mashtrimit, raportojnë mediat në Prishtinë

Sipas hetimeve, nga viti 2015 deri në vitin 2019, të dyshuarit kanë mashtruar qytetarë të Kosovës përmes shitjes së avio-biletave.

Ndërkohë, mediumi kosovar Sinjali ka publikuar edhe emrat e personave të dyshuar të përfshirë në këtë rast, por autoritetet nuk kanë bërë ende publike identitetin e tyre në mënyrë zyrtare.

Policia ka bërë të ditur se njëri nga të dyshuarit ka vazhduar aktivitetin e kundërligjshëm përmes shpëlarjes së parave, duke përdorur kompani të kontrolluara prej tij, ku vlera e mjeteve të dyshuara tejkalon 2 milionë euro.

Hetimet financiare kanë zbuluar gjithashtu deponime në para të gatshme mbi 800 mijë euro, për të cilat nuk është dëshmuar prejardhja.

Me vendim të prokurorit, i dyshuari është ndaluar për 48 orë, ndërsa hetimet janë në vazhdim.