Erdhi për pushime në Kosovë, mërgimtari vritet nga e dashura

Tre viktima nga të shtënat me armë zjarri në fshatin Majac, 43-vjeçari kishte ardhur për pushime në Kosovë

Një ngjarje e rëndë ka tronditur Podujevën dhe mbarë opinionin publik, ku tre persona kanë humbur jetën si pasojë e një incidenti të përgjakshëm me armë zjarri, transmeton albinfo.ch.

Ngjarja ndodhi të dielën në mbrëmje, në fshatin Majac, ku një mërgimtar 43-vjeçar nga Kosova, i identifikuar si I.B., i cili jetonte dhe vepronte në Gjermani, u qëllua për vdekje nga e dashura e tij.

Sipas informacioneve 31-vjeçarja, e cila dyshohet si autore e krimit, fillimisht qëlloi me armë zjarri I.B . Më pas, ajo qëlloi edhe një grua 73-vjeçare, e cila ishte bashkëshortja e xhaxhait të saj, përpara se të drejtonte armën nga vetja dhe të kryente vetëvrasje.

Si pasojë e të shtënave, tre persona humbën jetën në vendin e ngjarjes, duke e kthyer këtë rast në një nga ngjarjet më të rënda të ditëve të fundit në Kosovë, transmeton tutje albinfo.ch.

I.B , i cili jetonte jashtë Kosovës, kishte ardhur për pushime në vendlindje, për festën e Fitër Bajramit, ndërsa motivet e kësaj tragjedie ende nuk janë bërë të ditura zyrtarisht.

Familja e viktimës ka konfirmuar lajmin e rëndë përmes një njoftimi prekës, duke shprehur dhimbjen për humbjen e të afërmit të tyre.

“Te Allahut jemi dhe tek Ai do të kthehemi”, thuhet në njoftim. “Me dhimbje të thellë ju njoftojmë se ndërroi jetë vëllau ynë I.B. Lusim Allahun ta ketë marrë në mëshirën e Tij”.

Familjarët kanë bërë të ditur se për kohën dhe vendin e ceremonisë së varrimit do të njoftojnë në vijim.

Ndërkohë, autoritetet po vijojnë hetimet për të zbardhur plotësisht rrethanat dhe motivet që çuan në këtë akt tragjik./Albinfo.ch

---