Qeveria e Kosovës: Të hënën miratohen 500 mijë euro për “Dardanët”

Shpërblehen “Dardanët” pas triumfit të fuqishëm

Ministri i Financave, Punës dhe Transfereve, Hekuran Murati, ka konfirmuar se Qeveria e Kosovës të hënën pritet të miratojë ndarjen e 500 mijë eurove për Kombëtaren e Kosovës, transmeton albinfo.ch.

Sipas Muratit, vendimi do të procedohet në mbledhjen e radhës të Qeverisë, pas kërkesës së Kryeministrit Albin Kurti, si shpërblim për fitoren e rëndësishme të “Dardanëve” ndaj Sllovakisë me rezultat 4:3.

Murati e bëri të ditur këtë lajm përmes një postimi në rrjetet sociale, duke theksuar se kjo është përmbushje e premtimit të dhënë ndaj Kombëtares pas suksesit të arritur në ndeshjen e fundit.

Kosova me këtë fitore siguroi kualifikimin në finalen e play-offit për Kampionatin Botëror 2026, ku të martën do të përballet me Turqinë në stadiumin “Fadil Vokrri” në Prishtinë./Albinfo.ch

---