Erdogan reagon pas fitores së kombëtares turke ndaj Kosovës

Erdogan reagon pas fitores ndaj Kosovës: E përgëzoj Kombëtaren tonë për kualifikimin në Botëror

Presidenti turk u shpreh i lumtur pas triumfit 1-0 në “Fadil Vokrri”, duke uruar sukses për Turqinë në Kupën e Botës 2026 dhe duke theksuar rikthimin pas 24 vitesh në skenën më të madhe të futbollit, përcjell albinfo.ch.

Presidenti i Turqisë, Recep Tayyip Erdogan, ka reaguar pas fitores së Kombëtares së Turqisë ndaj Kosovës, fitore kjo që i siguroi turqve kualifikimin në Kampionatin Botëror 2026.

Turqia triumfoi me rezultat minimal 1-0 në stadiumin “Fadil Vokrri” në Prishtinë, në finalen e “play-off”-it, duke siguruar kështu biletën për Botërorin e ardhshëm.

Pas këtij suksesi të rëndësishëm, Erdogan nuk ka munguar me një reagim publik në platformën “X”, ku ka përgëzuar ekipin kombëtar për arritjen e madhe.

“E përgëzoj me gjithë zemër Kombëtaren tonë A, Djemtë Tanë, për sigurimin e një vendi në finalet e Kupës së Botës duke mposhtur Kosovën në finalen e play-off-it për Botërorin 2026”, ka shkruar Erdogan.

Ai ka theksuar se Turqia do të rikthehet në Kupën e Botës pas 24 vitesh, duke shprehur besim të plotë se ekipi do të përfaqësojë me krenari shtetin turk në arenën ndërkombëtare.

“I uroj suksese Kombëtares sonë, e cila do ta valëvitë flamurin tonë me gjysmëhënë dhe yll në skenën më të madhe të futbollit pas 24 vitesh”, ka shtuar ai.

Erdogan ka përmendur edhe kundërshtarët e Turqisë në fazën e grupeve, Australinë, Paraguajin dhe SHBA-në, duke shprehur shpresën që ekipi të shkojë sa më larg në turne.

“Kemi besim të plotë se Djemtë Tanë do ta çojnë fanellën me gjysmëhënë dhe yll nga fitorja në fitore dhe do ta mbushin kombin tonë me krenari. I puth të gjithë sportistët tanë në ballë”, përfundoi Erdogan.

Turqia tashmë ka siguruar pjesëmarrjen në Botërorin 2026, ndërsa Kosova mbetet jashtë, duke e përmbyllur rrugëtimin e saj historik me eliminimin në finalen e plejofit./Albinfo.ch

---