Shtëpia botërore e futbollit, FIFA, shkruan për Kosovën

Keystone EPA/GEORGI LICOVSKI

Shtëpia botërore e futbollit, FIFA, ka shkruar për rritjen e madhe të Kosovës.

Përmes një postimi në rrjetet sociale, FIFA e ka publikuar ranglistën e re të përfaqësueseve, teksa ka publikuar fotografi të Fisnik Asllanit dhe Dion Gallapenit.

“Kosova vazhdon të ngjitet”, shkruan në titull, ndërsa në tekst thuhet se Kosova e ka regjistruar ngjitjen më të madhe në ranglistë deri tani.

Në fotografinë e dytë është paraqitur Florent Muslija, ndërsa shkruhet: “Kosova ishte e 190-ta në korrik të vitit 2016”, dhe që nga ajo kohë “trajektorja ka qenë në rritje”, transmeton albinfo.ch.

Fotografia e tretë e publikuar është me Kreshnik Hajrizin, dhe paraqitet rekordi i ri i arritur nga Kosova, që tani është në pozitën e 78-të në ranglistë.

“Pavarësisht se nuk u kualifikua për në Kupën e Botës, Kosova është ngjitur në pozitën e 78-të në ranglistën botërore të FIFA-s, që është pozita më e lartë e arritur deri tani”, ka shkruar FIFA.

Fotografia e fundit është e futbollistëve të Kosovës gjatë intonimit të himnit shtetëror.

“Kampanja impresive e Kosovës në kualifikimet e Kupës së Botës e ka ndihmuar që ta arrijë këtë renditje, pasi përfundoi në pozitën e dytë në grupin e vet dhe e mposhti Sllovakinë në gjysmëfinale të plejofit evropian, para se të mposhtej nga Turqia në finale”, thuhet ndër të tjera në postim.