Të drejtat dhe privilegjet e Vjosa Osmanit dhe familjes së saj pas përfundimit të mandatit presidencial

Mandati i Vjosa Osmanit si presidente e Kosovës përfundoi më 4 prill 2026, dhe përkohësisht vendin e saj e mori kryeparlamentarja Albulena Haxhiu.

Edhe pas përfundimit të mandatit pesëvjeçar, Osmani përfiton disa të drejta sipas Ligjit për Presidentin e Republikës së Kosovës. Ajo do të vazhdojë të përdorë titullin “Presidente”.

Ligji parashikon që ish-presidentja ka të drejtë të marrë pension, që është 70% e pagës që ka pasur gjatë kohës së shërbimit si kryetare e shtetit.

Për më tepër, Osmani dhe familja e saj – burri dhe fëmijët – kanë të drejtë për sigurim shëndetësor të plotë dhe qasje në shërbime mjekësore në spitalet publike dhe ushtarake gjatë gjithë jetës.

Sipas ligjit, ish-presidenti ka të drejtë për një kompensim kalimtar për shtatë muaj pas përfundimit të mandatit, që mund të përdoret për zyrë, staf, telekomunikacion, shërbime postare dhe materiale të tjera të nevojshme për periudhën e tranzicionit.

Osmani dhe familja e saj do të kenë mbrojtje personale për tre vitet e ardhshme dhe mund të marrin pjesë në ngjarje shtetërore sipas protokollit.

Ligji gjithashtu u mundëson atyre përdorimin e pasaportës diplomatike të Kosovës gjatë gjithë jetës, ndërsa fëmijët e tyre e kanë këtë të drejtë deri në moshën 18 vjeç.

Ish-presidentja mund të shpenzojë fonde për aktivitetet që kryen si ish-president, të sigurta nga buxheti i Zyrës së Presidentit. Për pesë vitet e para pas mandatit, zyrës së ish-presidentit mund t’i shërbejnë maksimumi tre persona.

Sipas ligjit, angazhimet e ish-presidentit nga Qeveria e Kosovës shënojnë fillimin e periudhës pesëvjeçare pas përfundimit të detyrës.