Rina Januzi, artistja shqiptare nga Kosova që po shkëlqen në Finlandë

Me zërin e saj unik dhe interpretimin emocional në piano, Rina Januzi është përzgjedhur mes 30 artistëve finalistë për festivalin prestigjioz “Louhela Jam 2026” në Vantaa.

Bëhet fjalë për Rina Januzi, e cila është një artiste shqiptare nga Kosova, e cila jeton dhe vepron prej vitesh në Finlandë, ku po ndërton një rrugëtim serioz dhe të dallueshëm në skenën muzikore, transmeton albinfo.ch.

E njohur për një zë të veçantë dhe ngjyrime të ëmbla vokale, Rina shquhet për delikatesën në interpretimin live, duke reflektuar profesionalizëm dhe ndjeshmëri artistike në çdo paraqitje.

Ajo arrin të krijojë një atmosferë të ngrohtë dhe emocionale, duke e bërë muzikën e saj lehtësisht të dallueshme dhe të pëlqyeshme për publikun.

Përveç këndimit, ajo shoqëron performancat e saj edhe me pianon, instrument të cilin e zotëron me mjeshtëri, duke i dhënë çdo interpretimi një dimension më të plotë dhe më artistik, transmeton tutje albinfo.ch.

 

 

Së fundmi, Rina ka ndarë një lajm të rëndësishëm me ndjekësit e saj, duke bërë të ditur se është përzgjedhur mes 30 artistëve nga gjithsej 249 aplikantë, për të pasur mundësinë të performojë në festivalin prestigjioz Louhela Jam 2026, i cili mbahet në Vantaa, Finlandë.

“Jam jashtëzakonisht mirënjohëse dhe e lumtur që jam përzgjedhur mes 30 artistëve nga 249 aplikantë… Tani gjithçka varet nga ju. Vetëm 5 artistë me më shumë vota nga publiku do të ngjiten në skenën e festivalit… dhe kjo do të thoshte shumë për mua”, është shprehur ajo.

Votimi është i hapur deri më 13 prill, ndërsa publiku ka mundësi të votojë për dy artistë të ndryshëm. Rina u ka bërë thirrje mbështetësve që ta votojnë dhe të shpërndajnë postimin e saj, duke theksuar se përkrahja e tyre është vendimtare në këtë hap të rëndësishëm të karrierës së saj./Albinfo.ch

 

Nga Suedia, Rina Januzi nominohet në “Netët e Klipit Shqiptar 2025”

---