Ekstradohet nga Zvicra në Kosovë i kërkuari për falsifikim parash

Një shtetas i Kosovës i dyshuar për veprën penale “falsifikim i parave” është ekstraduar nga Zvicra në Kosovë, pas një bashkëpunimi ndërkombëtar mes autoriteteve të të dy vendeve.

Policia e Kosovës, përmes Drejtorisë për Bashkëpunim Ndërkombëtar Policor dhe në koordinim me njësitë relevante dhe institucionet e drejtësisë, ka realizuar sjelljen e tij në Kosovë. Ai ishte i kërkuar me letër-rreshtim ndërkombëtar të INTERPOL-it, pasi i ishte shmangur drejtësisë në vend.

Sipas njoftimit të Policisë, i dyshuari ishte arrestuar më herët nga autoritetet zvicerane dhe më pas është dorëzuar tek organet e rendit në Kosovë, ku do të vazhdojnë procedurat e mëtejme ligjore ndaj tij.

Policia e Kosovës ka theksuar se do të vazhdojë bashkëpunimin me institucionet vendore dhe ndërkombëtare për parandalimin, hetimin dhe zbulimin e veprave penale, si dhe për kapjen e personave të kërkuar brenda dhe jashtë vendit.