Albin Pllashniku, shembull suksesi i diasporës në Suedi

Studenti i ekonomisë në Universitetin e Östersundit kontribuon në diplomacinë ekonomike duke analizuar ndikimin e diasporës shqiptare në ekonominë suedeze.

Albin Pllashniku, student i ekonomisë në Universitetin e Östersundit në Suedi, po shquhet si një nga të rinjtë më premtues të diasporës sonë, me angazhim të veçantë në fushën e diplomacisë ekonomike, transmeton albinfo.ch.

Kontributi i tij është fokusuar në hartimin dhe analizimin e pranisë ekonomike të diasporës shqiptare në Suedi, duke sjellë të dhëna të rëndësishme për ndikimin e saj në tregun suedez.

Pllashniku ka kontribuar në një raport profesional, ku janë evidentuar rreth 70 kompani me përfaqësim pronësie nga diaspora jonë, të cilat realizojnë një qarkullim total prej rreth 3.3 miliardë korona suedeze (SEK) dhe kanë krijuar mbi 1,000 vende pune, transmeton tutje albinfo.ch.

 

 

Sipas raportit, sektorët kryesorë ku diaspora është më aktive janë:

• Ndërtim & Infrastrukturë – 28.8%

• Tregti & Financë – 27.6%

• IT, Konsulencë & Shërbime ligjore – 25.2%

• Transport – 10.8%

• Industri & Prodhim – 7.5%

Përveç angazhimit akademik, Albin Pllashniku ka përfunduar me sukses edhe praktikën profesionale në Ambasadën e Republikës së Kosovës në Stokholm, ku kontribuoi në aktivitetet e institucionit dhe në avancimin e bashkëpunimit me komunitetin dhe bizneset e diasporës.

Ambasada e Republikës së Kosovës në Suedi ka vlerësuar punën dhe përkushtimin e tij, duke i uruar suksese të mëtejshme në rrugëtimin profesional.

Me pak fjalë, Albin Pllashniku mbetet një shembull i qartë se si të rinjtë e diasporës mund të kontribuojnë jo vetëm në zhvillimin e tyre personal, por edhe në fuqizimin e rolit ekonomik të komunitetit shqiptar në Suedi./Albinfo.ch

 

 

---