Vdes akademiku Rexhep Qosja, figura e shquar e letërsisë dhe mendimit shqiptar

Akademiku Rexhep Qosja, një nga personalitetet më të njohura të letërsisë, kritikës letrare dhe mendimit kombëtar shqiptar, ka ndërruar jetë, shkruan albinfo.ch.

Lajmin për vdekjen e tij e kanë bërë të ditur familjarët, përmes një njoftimi ku thuhet se tashmë është kryer edhe ceremonia e varrimit.

Rexhep Qosja ishte një prej figurave më të rëndësishme të kulturës shqiptare, i njohur për kontributin e tij të jashtëzakonshëm në studimet letrare, historinë e letërsisë shqipe, publicistikë dhe debatet shoqërore e politike ndër vite.

Ai do të kujtohet si një intelektual i angazhuar dhe si një zë i fuqishëm në mbrojtje të çështjeve kombëtare, duke lënë pas një trashëgimi të pasur me vepra shkencore, eseistike dhe letrare që kanë shënuar breza të tërë.

Vdekja e akademikut Rexhep Qosja përbën një humbje të madhe për kulturën dhe akademinë shqiptare, ndërsa figura dhe vepra e tij do të mbetet e gjallë në historinë e mendimit shqiptar./Albinfo.ch