Osmani mohon akuzat: Takimet me qytetarë s’janë ndalur asnjëherë

Ish-presidentja thotë se pretendimet se ajo po i takon qytetarët vetëm së fundmi janë dezinformata dhe publikon pamje nga vizitat gjatë mandatit të saj.

Ish-presidentja e Kosovës, Vjosa Osmani, ka mohuar deklaratat e disa zyrtarëve politikë se ajo ka nisur t’i takojë qytetarët vetëm këto ditë, duke i cilësuar këto pretendime si dezinformata, përcjell albinfo.ch.

Përmes një video-mesazhi në rrjetet sociale, Osmani ka publikuar edhe fotografi nga vizitat e saj nëpër komuna dhe zona të ndryshme të vendit gjatë mandatit të saj si presidente.

Ajo tha se takimet me qytetarë nuk janë ndalur asnjëherë dhe se gjatë pesë viteve të mandatit ka qenë vazhdimisht e pranishme në terren.

“Meqenëse ka njerëz brenda politikës që po ankohen se pse po i takoj qytetarët, e disa madje dezinformojnë se nuk e kam bërë më herët, ja e vërteta. Përgjatë pesë viteve mandat, vazhdimisht kam vizituar komunat, kam takuar qytetarët, kam mbështetur grupet e margjinalizuara dhe kam qenë pranë njerëzve të vyer e të urtë të vendit tonë”, ka deklaruar Osmani.

Ajo shtoi se ka vizituar fshatra e lagje të ndryshme, shkolla, kopshte, spitale dhe institucione të tjera, duke përmendur edhe shoqatat e zjarrfikësve.

Sipas saj, lidhja me qytetarët do të mbetet baza kryesore e angazhimit të saj edhe në të ardhmen.

“Këto vizita nuk janë ndalur asnjëherë, sikurse dje, ashtu edhe sot e mbi të gjitha në të ardhmen. Bazamenti më i fortë i angazhimit tim do të mbetet pikërisht lidhja me qytetarët… Shihemi në komunën e radhës”, u shpreh Osmani./Albinfo.ch

---