Mes sfidave rajonale, Kurti kërkon mbështetje më të madhe nga BE-ja

Kryeministri në detyrë i Kosovës, Albin Kurti, ka zhvilluar një takim me Përfaqësuesen e Lartë të Bashkimit Evropian për Punë të Jashtme dhe Politikë të Sigurisë, Kaja Kallas, në kuadër të Samitit të Komunitetit Politik Evropian në Jerevan.

Gjatë takimit, palët diskutuan për situatën politike në rajon dhe çështjet e sigurisë në kontekstin e sfidave ndërkombëtare në rritje. Kurti theksoi rëndësinë e harmonizimit me Bashkimi Evropian në përballimin e këtyre sfidave dhe avancimin e rrugës evropiane të Kosovës.

Kryeministri në detyrë rikonfirmoi përkushtimin e Kosovës për zbatimin e reformave dhe kërkesën për marrjen e statusit të vendit kandidat për anëtarësim në BE, duke theksuar progresin e arritur dhe nevojën për një proces të drejtë, të bazuar në meritë.

Në takim u trajtuan edhe zhvillimet e fundit politike në vend, përfshirë zbatimin e ligjit për të huajt dhe dakordimin e datës 14 mars, e cila u vlerësua si një hap pozitiv për zhvillimet e mëtejshme.

Po ashtu, pjesë e diskutimeve ishte edhe dialogu ndërmjet Kosovës dhe Serbisë, si dhe gjendja e shqiptarëve në Preshevë, Medvegjë dhe Bujanoc. Kurti ngriti shqetësime për pasivizimin e adresave dhe mungesën e mbështetjes financiare për këto zona.

Takimi u zhvillua në frymë konstruktive, duke theksuar rëndësinë e vazhdimit të bashkëpunimit dhe komunikimit të ngushtë ndërmjet institucioneve të Kosovës dhe Bashkimit Evropian.