Superkupa Kosovë–Diasporë organizohet për herë të parë në Gjenevë

FC Prishtina dhe FC Kosova Genève u përballën në ndeshjen për trofe, në një ngjarje të rëndësishme për komunitetin shqiptar në Zvicër

Konsullata e Republikës së Kosovës në Gjenevë ka qenë pjesë e aktivitetit tradicional “Superkupa Kosovë–Diasporë”, i cili këtë vit u organizua për herë të parë në Gjenevë, duke shënuar një moment të veçantë për komunitetin shqiptar në Zvicër, transmeton albinfo.ch.

Ky aktivitet u organizua nga FC Kosova Genève dhe Unioni i Klubeve Shqiptare të Futbollit në Zvicër, nën ombrellën e Federatës së Futbollit të Kosovës (FFK), me mbështetjen e Ministrisë së Kulturës, Rinisë dhe Sportit si dhe të Ministrisë së Punëve të Jashtme dhe Diasporës.

Në ndeshjen finale për trofe u përballën FC Prishtina dhe FC Kosova Genève, duke dhuruar emocione të mëdha dhe një atmosferë të jashtëzakonshme sportive, e cila u përjetua me entuziazëm nga të pranishmit.

Organizimi i Superkupës në Gjenevë u vlerësua si një ngjarje me rëndësi të veçantë, që forcon lidhjet mes sportit në Kosovë dhe diasporës shqiptare, duke promovuar unitetin dhe frymën e bashkëpunimit.

Konsullata falënderoi organizatorët, klubet pjesëmarrëse dhe të gjithë bashkatdhetarët për kontributin dhe pjesëmarrjen në këtë ngjarje që i jep vlerë komunitetit shqiptar në Zvicër./Albinfo.ch

 

https://www.facebook.com/share/18WA7dcBQ7/?mibextid=wwXIfr

---