NATO: Serbia e di kush janë autorët e sulmit në Banjskë, kërkohet llogaridhënie

Aleanca kërkon zbardhje të plotë dhe dorëzimin e përgjegjësve për sulmin e vitit 2023 në veri të Kosovës

Zëvendës Ndihmës Sekretari i Përgjithshëm i NATO-s për Partneritete, Kevin Hamilton, ka deklaruar në Prishtinë se Aleanca pret drejtësi për sulmin në Banjskë të vitit 2023, duke theksuar se autorët duhet të sillen para drejtësisë dhe se Serbia, sipas tij, i njeh ata, transmeton albinfo.ch.

Ai tha se situata e sigurisë në Kosovë aktualisht është stabile, por NATO vazhdon të mbetet e angazhuar përmes KFOR-it për ruajtjen e paqes dhe parandalimin e çdo përshkallëzimi.

Hamilton nënvizoi se përparimi në marrëdhëniet NATO–Serbi dhe në bashkëpunim praktik varet nga përmbushja e kërkesës për llogaridhënie lidhur me sulmin, shkruan telegrafi.

Ai përsëriti se NATO mbështet dialogun Kosovë–Serbi të udhëhequr nga BE-ja dhe kërkon që procesi të vazhdojë në mënyrë të qëndrueshme dhe të strukturuar./Albinfo.ch

---