Qeveria e Kosovës ndan nga 100 euro për pensionistë, fëmijë, studentë dhe sektorin privat

Kabineti qeveritar pritet të miratojë edhe rritjen e shtesave për lehonat nga 325 në 500 euro në muaj.

Qeveria e Kosovo pritet të miratojë një paketë të re mbështetëse për përballje me inflacionin, e cila parasheh ndarjen e nga 100 eurove për pensionistët, fëmijët, punonjësit e sektorit privat dhe studentët aktivë, përcjell albinfo.ch.

Lajmin e bëri të ditur kryeministri në detyrë Albin Kurti në fillim të mbledhjes së kabinetit qeveritar, duke theksuar se Ministria e Financave ka përgatitur “Pakon për përballje me inflacionin 2.0”.

Sipas Kurtit, mbështetja e njëhershme prej 100 eurosh do të përfshijë:

* pensionistët,

* fëmijët,

* punonjësit e sektorit jopublik,

* si dhe studentët aktivë.

Ai bëri të ditur se pagesat për familjet përfituese pritet të realizohen në fillim të javës së ardhshme.

Po ashtu, Qeveria pritet të miratojë edhe rritjen e shtesave për lehonat. Sipas vendimit të paralajmëruar, mbështetja mujore për lehonat do të rritet nga 325 euro në 500 euro në muaj.

Kurti tha se fillimisht shtesat për lehonat e papuna kishin nisur me 170 euro për gjashtë muaj, ndërsa për lehonat e punësuara për tre muaj. Më pas ato ishin rritur në 325 euro, ndërsa tani do të harmonizohen me pagën minimale të re prej 500 eurosh, e cila hyn në fuqi nga 1 korriku.

Masat pritet të votohen dhe të miratohen në vazhdim të mbledhjes së Qeverisë./Albinfo.ch

 

 

 

 

 

 

---