KQZ sqaron mungesën e shiritit ngjitës në votimin me postë

Institucioni thotë se mungesa e shiritit shtesë nuk ndikon në vlefshmërinë dhe sigurinë e fletëvotimeve

Central Election Commission of Kosovo ka dalë me një sqarim zyrtar pas shqetësimeve të ngritura nga disa votues jashtë Kosovës lidhur me mungesën e shiritit ngjitës në pakot e votimit përmes postës, përcjell albinfo.ch

Sipas KQZ-së, procesi i votimit jashtë vendit është i rregulluar dhe i siguruar me mekanizma të tjerë mbrojtës, ndërsa mungesa e shiritit shtesë ngjitës nuk ndikon në vlefshmërinë e fletëvotimit.

“Ashtu si në zgjedhjet e parakohshme për Kuvendin e Kosovës të mbajtura në dhjetor 2025, edhe në zgjedhjet aktuale nuk është paraparë përdorimi i shiritit ngjitës të KQZ-së”, thuhet në reagim.

Institucioni sqaron se zarfi i fshehtësisë mbyllet me ngjitësin standard të vet zarfit dhe se procesi mbetet plotësisht i sigurt.

KQZ ka bërë të ditur se fletëvotimet përmbajnë elemente të shumta sigurie, përfshirë mikroshtypin, UV printin dhe elementin “anti-copy”, të cilat shërbejnë për të parandaluar kopjimin apo falsifikimin.

Po ashtu, çdo fletëvotim i dërguar jashtë Kosovës është i vulosur në pjesën e pasme me vulë të zezë, për të cilën KQZ thekson se nuk nënkupton se bëhet fjalë për kopje të fletëvotimit.

Institucioni ka rikujtuar edhe procedurën e votimit me postë, duke sqaruar se fletëvotimi duhet të vendoset fillimisht në zarfin e fshehtësisë, më pas në zarfin kthyes së bashku me dëftesën e regjistrimit, dhe të dërgohet përmes postës.

Në fund, KQZ u ka bërë thirrje votuesve jashtë Kosovës që pakot e tyre të votimit të arrijnë në adresën përkatëse më së largu deri më 6 qershor 2026.

https://kqz-ks.org/sqarim-nga-kqz-lidhur-me-votimin-permes-postes/

/Albinfo.ch

---