Kosova merr mbështetje nga Brukseli dhe Uashingtoni, por përballet me sfida politike

BE dhe SHBA sinjalizojnë mbështetje për integrimin evropian dhe NATO, ndërsa paralajmërojnë për krizën e brendshme politike

Kosova ka marrë të mërkurën sinjale të rëndësishme mbështetjeje nga institucionet e Bashkimit Evropian dhe nga përfaqësues të Shteteve të Bashkuara të Amerikës, por njëkohësisht është përballur edhe me vërejtje për krizën politike që po ndikon në funksionimin e institucioneve, përcjell albinfo.ch.

Në Brukseli, Komiteti për Punë të Jashtme i Parlamenti Evropian miratoi raportin për Kosovën, të hartuar nga eurodeputeti Riho Terras. Dokumenti vlerëson progresin e Kosovës, por shpreh shqetësim për bllokimin politik dhe ngadalësimin e reformave.

Raporti thekson se mosfunksionimi i institucioneve ka ndikuar në humbjen e kohës së vlefshme për procesin e integrimit evropian dhe kërkon që Kosova të mos mbetet prapa në shfrytëzimin e mundësive që ofron Bashkimi Evropian.

Megjithatë, dokumenti mbështet vazhdimin e procesit të integrimit evropian dhe u bën thirrje vendeve anëtare të BE-së që të avancojnë me procedurat për dhënien e statusit të kandidatit për Kosovën. Po ashtu, mirëpritet heqja e masave ndëshkuese të BE-së dhe theksohet rëndësia e dialogut me Serbia, përfshirë kërkesën që përgjegjësit për sulmin në Banjska të dalin para drejtësisë.

Në anën tjetër, në Washington DC, çështja e Kosovës u trajtua në një seancë dëgjimore në Kongresin amerikan, ku mori pjesë Sekretari i Shtetit Marco Rubio.

Kongresmeni Keith Self, pas vizitës së tij në Kosovë dhe rajon, bëri thirrje për mbështetje të anëtarësimit të Kosovës në NATO, duke e cilësuar Ballkanin Perëndimor si një zonë ende të ndjeshme nga aspekti i sigurisë.

Në përgjithësi, zhvillimet e fundit tregojnë një balancë mes mbështetjes ndërkombëtare për Kosovën dhe sfidave të brendshme politike që vazhdojnë të mbeten pengesë në proceset e saj integruese./Albinfo.ch

---