Katy Perry konfirmohet për “Sunny Hill Festival”, ylli botëror vjen në Prishtinë

Superylli amerikan i muzikës pop, Katy Perry, është emri i parë i madh i konfirmuar për edicionin e sivjetmë të “Sunny Hill Festival”, që do të mbahet nga 31 korriku deri më 2 gusht në Prishtinë.

“Sunny Hill Festival” ka zbuluar emrin e parë të madh që do të ngjitet në skenën e edicionit të sivjetmë, duke konfirmuar pjesëmarrjen e këngëtares me famë botërore Katy Perry, transmeton albinfo.ch.

Lajmi u bë i ditur nga organizatorët e festivalit përmes një videoje ku shfaqet një bisedë mes Dua Lipës dhe Katy Perryt. Gjatë bisedës, Dua e pyet këngëtaren amerikane për planet e saj gjatë verës, ndërsa Perry zbulon se një nga destinacionet e saj do të jetë Prishtina.

Pjesëmarrja e autores së hiteve globale si “Firework”, “Roar”, “Dark Horse” dhe “California Gurls” pritet të jetë një nga momentet kulmore të festivalit dhe të tërheqë mijëra adhurues të muzikës nga Kosova dhe rajoni.

Edicioni i sivjetmë i “Sunny Hill Festival” do të mbahet më 31 korrik, 1 dhe 2 gusht, ndërsa organizatorët kanë paralajmëruar se së shpejti do të konfirmohen edhe të paktën dy emra të tjerë të mëdhenj të skenës ndërkombëtare.

Me konfirmimin e Katy Perryt, festivali nis fuqishëm prezantimin e programit të tij artistik, duke premtuar një tjetër verë spektakolare në Prishtinë./Albinfo.ch

https://www.instagram.com/reel/DZKOa_wtmN4/?igsh=aHdyNDU4b25zcTJx

---