Zvicra mbështet vëzhgimin e zgjedhjeve në Kosovë përmes Demokracisë në Veprim

Ambasada zvicerane thekson rëndësinë e zgjedhjeve të lira dhe të ndershme për forcimin e besimit publik dhe transparencës demokratike.

Zvicra ka shprehur mbështetjen e saj për misionin e vëzhgimit të zgjedhjeve të organizuar nga Demokracia në Veprim, duke riafirmuar angazhimin për forcimin e proceseve demokratike në Kosovë, përcjell albinfo.ch.

Përmes një mesazhi publik, përfaqësuesit zviceranë vlerësuan rolin e shoqërisë civile në monitorimin e procesit zgjedhor dhe në promovimin e standardeve demokratike.

“Zvicra ka kënaqësinë të mbështesë misionin e vëzhgimit të zgjedhjeve të Demokracisë në Veprim dhe përpjekjet e saj për të forcuar proceset demokratike”, thuhet në njoftim.

Sipas këtij vlerësimi, zgjedhjet e lira dhe të ndershme janë thelbësore për ruajtjen e besimit të qytetarëve në institucione, rritjen e transparencës demokratike dhe sigurimin e pjesëmarrjes kuptimplotë të secilit qytetar në proceset vendimmarrëse.

Mbështetja e Zvicrës ndaj misioneve të vëzhgimit konsiderohet si pjesë e angazhimit të vazhdueshëm për promovimin e demokracisë, sundimit të ligjit dhe institucioneve të forta demokratike në Kosovë. /Albinfo.ch

---