Nisin të publikohen votat për kandidatët e LDK-së, Vjosa Osmani kryeson listën

Me numërimin e rezultateve nga 83 vendvotime, Vjosa Osmani renditet si kandidatja më e votuar e LDK-së, e ndjekur nga Lumir Abdixhiku dhe Doarsa Kica-Xhelili.

 

Komisioni Qendror i Zgjedhjeve ka nisur publikimin e rezultateve të para për kandidatët që garojnë për një ulëse në Kuvendin e Kosovës, ndërsa procesi i numërimit po vazhdon në të gjithë vendin, përcjell albinfo.ch.

Sipas të dhënave të deritanishme, janë procesuar 83 vendvotime, që përbëjnë 3.32 për qind të totalit, duke ofruar një pasqyrë fillestare të mbështetjes që kanë marrë kandidatët brenda subjekteve politike.

Në listën e Lidhja Demokratike e Kosovës, prin Vjosa Osmani, e cila deri në këtë fazë të numërimit ka siguruar numrin më të madh të votave.

Pas saj renditet kryetari i LDK-së, Lumir Abdixhiku, ndërsa vendin e tretë e mban Doarsa Kica-Xhelili.

Në mesin e kandidatëve më të votuar deri më tani janë edhe Hykmete Bajrami, Avdullah Hoti, Ukë Rugova, Kujtim Shala, Ermal Sadiku, Anton Quni dhe Xhafer Gashi.

Megjithatë, bëhet fjalë për rezultate preliminare dhe renditja e kandidatëve mund të ndryshojë me vazhdimin e numërimit të votave në vendvotimet e mbetura.

Rezultatet e detajuara për secilin kandidat mund t’i gjeni në tabelën e publikuar më poshtë. /Albinfo.ch

---