Kompanitë zvicerane investuan 27 miliardë dollarë në SHBA, por mund të mos mjaftojë

Pavarësisht investimeve gjigante për të shmangur tarifat amerikane, Zvicra rrezikon ende të përballet me barriera të reja tregtare

Kompanitë zvicerane investuan rreth 27 miliardë dollarë në Shtetet e Bashkuara vetëm gjatë katër muajve të parë të vitit 2026, si pjesë e një angazhimi shumëvjeçar prej 200 miliardë dollarësh të marrë nga bizneset zvicerane ndaj administratës amerikane, shkruan The Local, transmeton albinfo.ch.

Marrëveshja u arrit pasi SHBA-ja pranoi të ulte tarifat për produktet zvicerane nga 39 për qind në 15 për qind. Megjithatë, investimet e mëdha mund të mos jenë të mjaftueshme për të garantuar trajtim të favorshëm në të ardhmen. Së fundmi, Uashingtoni ka paralajmëruar tarifa të reja për vendet që, sipas autoriteteve amerikane, nuk po bëjnë mjaftueshëm në luftën kundër punës së detyruar. Sipas propozimeve aktuale, Zvicra mund të përballet me një tarifë prej 12.5 për qind, më e lartë se ajo e paraparë për Bashkimin Evropian.

Ndër investitorët kryesorë zviceranë janë gjigantët farmaceutikë Novartis dhe Roche, të cilët po zgjerojnë kapacitetet e tyre prodhuese dhe kërkimore në SHBA. Investime të rëndësishme po bëjnë edhe kompani të tjera si Ypsomed dhe MSC.

Sipas Dhomës Amerikano-Zvicerane të Tregtisë, bizneset zvicerane po i përmbushin premtimet e tyre për investime, por pasiguria rreth politikës tregtare amerikane vazhdon të mbetet shqetësim për ekonominë zvicerane.

SHBA-ja është një nga partnerët më të rëndësishëm ekonomikë të Zvicrës dhe shumë kompani zvicerane po rrisin praninë e tyre në tregun amerikan për të mbrojtur eksportet dhe për të shmangur kostot shtesë që mund të vijnë nga tarifat tregtare.

---